（警告，以下我直頭會將個plot寫埋出嚟，想自己感受一次套戲嘅人就唔好睇喇）
細田守我諗唔洗介紹啦，喺香港睇得呢套戲嘅觀眾應該都唔會係屎忽痕得閒無聊是但揀一套戲睇就呢套啦之類嘅原因而入場，仲要香港啲場少到喊出聲，筆者睇嘅時候只係開畫嘅第七日，一日嘅場數竟然少過十場，而且唔知係落畫定啲戲院仲在觀望中，過多兩日之後已經係一場都見唔到，所以筆者都掉低咗本身約咗一齊睇嘅frd 嗱嗱聲睇咗先。
但其實咁少場都唔係意外，可能只係我高估咗少少細田守喺香港嘅知名度，而且未上之前已經聽到有唔少人都畀咗啲負面評價套戲，當然撞咗Marvel嘅Eternala我諗唔多唔少都有啲影響嘅。
不過，真係好彩自己有入場睇。
呢套戲真係好好睇。
自從上一套未來的未來之後，細田守又重新用返佢拿手嘅網絡做主題，就連個frd睇完trailer都話：「咪夏日大作戰～」
故事嘅一開始我哋就見到雀班公主企喺條全身都係喇叭嘅鯨魚上面唱住歌，受萬眾矚目。鏡頭一轉，一個外表極奇平凡嘅，雀斑公主嘅真身，戲嘅主角，内藤鈴出現咗喺畫面內，呢一吓，想畀觀察體驗到嘅就係失望。
wtf，呢個就係主角？
記住呢種感覺，同後面嘅劇情其實係大有關連。
故事返返去鈴未開始成為雀班公主之前，講咗一啲日常然後插序咗一段鈴娘親捨身救人嘅回憶。
捨身救人，然後畀網絡上面嘅人批評為魯莽、偽善、逞英雄。
呢件事對鈴嚟講有兩個面向：
一，佢唔理解點解娘親要冒住生命危險去救個細路。
二，網絡上嘅攻擊令現實嘅佢舉步維艱，唔敢去做任何嘢。
就連自己擁有嘅美妙歌聲，都唔能夠喺現實唱出嚟，即使係同娘親啲朋友合唱，都要瑟縮喺書枱下面唔可以畀人見到自己。因為好似無論做啲咩，都會有人批評自己，例如唔相信呢個平凡嘅樣貌會有美妙嘅歌聲，例如唔相信有人會命都唔要去救一個唔係自己生嘅細路。
然後U呢個app就出場喇。
喺網絡上製造一個自己嘅分身，同時又可以感受到同現實相符嘅體驗，喺呢個虛擬世界，隱藏咗真震身份嘅鈴終於可以用雀班公主嘅形象放聲高唱，因為冇人知角色背後嘅佢係邊個，就算畀人鬧到你狗血淋頭，好似套戲一開波噉講，呢個係一個可以重新嚟過嘅世界。
當然故事嘅發展係，雀班公主紅咗，雖然都係有一半嘅人鬧緊佢（鈴連分身得到嘅負評都好在意），但至少佢嘅演唱會係坐無虛席。呢個時候故事嘅另一個重要角色龍，伴隨住算係反派嘅側田帶住班正義警察同僚一齊衝入咗演唱會會場，就話龍因為周圍撩交打仲打到其他人啲替身損壞到用唔返令佢惡名昭彰，要替天行道，每次出現嘅時候仲帶住一堆title sponsors，威風凜凜噉想用佢嘅絕招綠寶石死光照出龍嘅現實真身。
鈴可能因為好奇心又或者好奇呢個同娘親一樣被眾人唾罵嘅龍背後有咩故事，係咪有咩苦衷（都係好奇心），想搵出佢嘅真正身份。最後搵到佢喺程式入面所棲息嘅城堡，主動關心但又被拒絕之製畀側田發現自己喺城堡附近徘徊想審問佢同龍係咩關係時，又畀龍救咗發現佢其實本性都唔壞，最後用美女與野獸嘅橋段感化咗佢。
但之後佢都係畀側田捉咗，威脅佢如果唔供出龍喺邊就會用綠寶石死光照到佢表露現實身份。最後雖然佢走得甩，但唔小心留底咗啲數據令側田查到龍座城堡喺邊，拉大隊諗住炒起佢。
鈴發現唯一可以拯救到龍嘅方法就係搵到佢現實嘅身分。又咁好彩因為一啲原因畀佢搵到，就發現龍原來係一個長期受到家暴嘅細路，因為保護細佬背部不斷增加被毒打嘅傷痕。一家嘅合照好早已經喺套戲嘅啲情景出現過，喺報紙上面嘅老豆表現到佢係一個和藹可親嘅好爸爸。噉就可以明白點解龍咁憎呢個虛擬世界，因為入面嘅人同佢老豆一樣，喺冇人見到嘅地方先會將自己嘅本身表露出嚟，亦都係弱小嘅佢對現實老豆嘅虐待僅餘可以做到嘅一種象徵式反抗。
當鈴話要幫佢嘅時候，佢亦都因為曾經有太多人同佢承諾過同樣嘅嘢但最後咩都冇改變到而拒絕溝通。
正當眾人苦惱點先可以得到龍嘅信任時，鈴一直暗戀緊嘅男性久武忍就畀咗個建議。
呢個時候想講吓久武忍呢個角色先，佢嘅定位除咗係鈴嘅暗戀對象之外，仲係一個令鈴同龍重疊嘅重要角色。基本上佢一出場就會同鈴講：「你冇嘢吖嘛，你有嘢可以同我講㗎喎，我聽緊喎。」但每次鈴都決定逃避佢嘅幫助，就好似龍而家逃避佢嘅幫助噉。所以由佢嚟話畀鈴聽應該點做係最適合不過。
佢嘅建議係，要鈴用真身，而唔係替身雀斑公主去唱歌。
呢個時候又想講吓點解鈴咁抗拒現真身呢樣嘢。首先，現真真代表佢唔可以逃避其他人嘅批評，唔可以再匿埋喺替身後面拒絕網路大軍嘅攻擊。可能你會話，佢冇做錯任何嘢有咩好驚，噉點解佢娘親當年都冇做錯嘢都畀人鬧，咪就係嗰時剩係識匿埋喺替身背後嘅人覺得匿名可以令佢哋逃避責任，現實自悲感作祟令佢哋不斷無理批評，頭先話一開頭公主同鈴嘅轉變令觀眾產生失望嘅感覺，鈴就係喺度懼怕呢樣嘢，就好似戲中段有場係忍拖住鈴隻手，一大班鍾意忍嘅女性就覺得鈴噉嘅雀班平凡樣咁斗膽同男神有身體接觸而炎上，佢懼怕當真正身分被披露之後啲人會因為佢嘅樣而批評佢所以佢先一直抗拒唔想畀呢件事發生。
呢個時候，鈴嘅身影又同佢娘親重疊咗：都係為咗救人而賭上自己嘅一切。連救人都要匿喺面具背後救，唔敢企出嚟，噉仲有咩說服力叫兩兄弟信任自己係真心想幫佢哋，仲點令兩兄弟有勇氣去對抗佢哋老豆嘅家暴？
拯救別人仲需要啲咩理由，就算係會令自己失去一切？
戲入面有一幕鈴問娘親啲朋友，點先可以幸福，長輩們支吾以對。
最後鈴發現，如果見到有人不幸而自己明明有能力但又唔去幫對方，噉自己仲點會幸福，邊值得擁有幸福。
所以佢做咗同佢娘親當年一樣嘅決定。由呢一幕開始，筆者隻眼就冇再乾過。
見到呢一幕嘅兩兄弟，決定再一次相信別人，決定向鈴求救。而鈴都好好噉回應咗佢哋。
聽講話好多人覺得套戲嘅結局好差，筆者未去睇其他人點講因為驚畀人影響咗自己寫緊影評時嘅諗法，但筆者好鍾意套戲個結局。
因為呢個結局代表住鈴終於有勇氣去面對現實，終於理解當年娘親嘅決定，終於敢喺現實世界自己做決定並付諸實行（如果你哋仲記得，鈴喺現實從來都只係會跟隨人哋畀佢嘅指令或者逃避人哋嘅邀請）。
畢竟人生最後都係要活喺現實世界，走出象徵住逃避嘅虛擬世界，難道唔係一個最好嘅結局咩？
最後係啲雜談：
- 鈴嘅另外兩個同學瑠果同頭慎可以話係鈴憧憬嘅兩種人，一個係本身有好嘅條件，做咩都唔會令人討厭嘅萬人迷，另一個係就算得自己一個就算畀眾人鄙視，都仍然堅持行自己想行嘅路嘅痴線佬。
- 除咗劇情之外呢套戲其實無論作畫定音樂嘅水準都係一流，有機會真係要入戲院睇，高級享受。
- 喇叭鯨魚呢個諗法真係好正，一嚟令人諗起令人類好奇嘅鯨歌，二嚟聲音喺水底比空氣傳播得更快更遠，就好似網絡世界噉。
- Beauty and the beast呢個主題唔知點解英文會明顯過中文咁多，戲嘅英文名係Belle，龍嘅名喺英文字幕度會出beast。
- 龍座城堡嘅一角有個龍船頭，另一角就插住條巨型八爪魚
