誠實啲！我係因為張poster而入場睇嘅！
所以廢話我哋唔多講，即刻睇一睇先（唔想睇嘅朋友都可以直兩段去睇我講戲）：
呢張poster主要有兩隻主色要留意：白色同粉紅色。
白色佔咗超過一半嘅面積，照正常人由上而下噉望張poster，會見到白色包圍住一個女人嘅半邊面，冇頭髮冇耳仔冇頸，加上一啲皺褶，就會即刻明白到背景係一件修女袍，純白色嘅象徵就會指向純潔同聖潔。
當然我哋嘅視線第一眼會去搵個主角出嚟，而呢位主角就係喺白中嘅一點粉紅，女性嘅嘴脣，亦都係女性面上最性感嘅部位，但呢個時候睇嘅人仲未會發現有咩問題，只係覺得怪怪哋。
衣領部分左邊嘅線比右邊更長更明顯，引領我哋嘅視線跟隨住條線望落去，然後好自然哋，我哋隻眼會畀左下角一大片肉色吸引住。
呢個就係點解張poster可以令我入場睇套戲嘅原因。
因為佢製造咗一個好大嘅反差。
唔係因為佢放咗一粒（應該係半粒）粉紅色嘅lin落去，而係因為佢將一粒（半粒）粉紅色嘅lin放咗喺白色嘅修女袍中間。
白色代表聖潔，而嘴脣，乳頭嘅粉紅色就代表住性，代表住慾念，禁果。呢個構圖本身已經係對基督教嘅一個挑戰。
最令人叫絕嘅係，粉紅色喺當中嘅地位係主角，係我哋（認咗佢啦）隻眼會停留最耐嘅區域。
簡直就係對觀眾進行咗一次道德批判嘅實驗！
總之，將聖同性結合嘅題材本身就足以吸引我去睇呢套戲。
順帶一提，我覺得呢套戲嘅中文譯名係幾唔錯，雖然只係將個性字換咗做聖，應該好簡單就諗到，但事實上又真係幾對題，始終戲入面對Benedetta（女主角）刻畫並唔只得對性嗰種慾望，仲有（甚至係更多）佢對宗教嘅愛。
順帶多一題：呢張poster喺香港大部分你會見到嘅地方都畀人遮咗粒lin，認真問，真係咁唔出得街咩，細路都會飲母乳啦。
噉不如我哋就講吓套戲。
相信大部分人睇完套戲心入面第一個問題應該係：噉究竟Benedetta係咪真係可以同神溝通？
仲記唔記得第一幕講Benedetta入修道院嗰兩場場戲佢總共顯現咗兩次「神蹟」：控制雀仔屙屎同畀聖母像推倒冇受傷。
我地好清楚呢兩件事並唔係佢嘅幻想，佢亦都冇能力去造假。（其實手手腳腳啲聖痕佢都應該做唔到假，佢用咩嚟整傷自己都冇人知）
所以我想講嘅係
其實佢係咪真係可以同神溝通，啲神蹟係咪真呢啲問題完全唔重要，亦唔係套戲嘅重點。
畢竟佢係跟隨真實故事去改編，你去問呢啲問題其實啫係問緊神係咪真係存在。所以答案係一樣，如果你信有神，噉佢就真係控制緊隻雀屙屎落人哋塊面度，如果你唔信，噉無論係雀屎定瘟疫，都只不過係巧合而已。
所以套戲嘅重點，係Benedetta對自己可以同神溝通呢件事深信不疑。
而呢個都係佢同其他角色最大分別，個個都識講不要怕只要信，但剩係要做到完全相信上帝，已經係一件難過登天嘅事。
無論係一嚟就同人講價嘅女院長，定係不可一世嘅教廷大使，宗教對佢哋嚟講都係一份工，一種權力同地位嘅手段多過信仰。
而Benedetta，從佢嘅每一次幻想都可令我哋更肯定佢係真係全心全意去相信神。
噉其實就足以證明，佢並冇刻意去耍把戲同手段，當佢出現傷痕佢係真係相信自己有聖痕，當佢叫前院長去觀禮時佢亦真係相信係上帝叫佢噉做。
因為「上帝會用你意想唔到嘅任何方式去同你溝通」。
（最令我驚嘆嘅係，佢畀Bartolomea（戲入面同Benedetta發生性行為嘅修女）出賣之後講咗句：「我注定要被背叛。」完全令人信服佢的確當呢一個發展係上帝嘅安排。）
入面有一場戲令我印象好深刻，嗰場戲係由Benedetta入房問大使隻腳係咪好酸，話不如幫佢洗腳開始。
洗腳呢樣嘢最主要嘅出處可以話係約翰福音第13章，耶穌為佢嘅門徒洗腳，普遍對呢個行為嘅解釋係耶穌想我哋學會要持有謙卑嘅心，放低身段，同埋要彼此相愛。
但大使聽到之後嘅第一個反應係疑惑，呢個時候已經變成院長嘅Benedetta點解會做埋呢啲唔符合身份嘅嘢？
呢個反應反映出兩人對信仰嘅諗法上有好大嘅對比，地位呢樣嘢喺大使心目中係好重要嘅嘢，係佢傲慢嘅主要來源。
而喺Benedetta一路幫佢洗腳嘅途中，冇記錯佢就喺度問Benedetta係咪愛Bartolomea，Benedetta嘅回答就係佢的確係愛Bartolomea，就好似佢愛其他人一樣，而佢做緊嘅行為其實亦都證明緊呢一點。
同時呢個狀態本身亦都極之矛盾，瑩幕上我地見到嘅係大使想揭發一場因為違反信仰而被判定為邪惡嘅禁斷之戀，但我哋由上一幕會得知，瑩幕背後發生緊嘅同時係大使捉咗Bartolomea落地下室用唔同嘅酷刑去迫佢承認自己嘅罪行，而事實上當時嘅大使係未有任何實質證據證明佢哋嘅罪名係成立，而且無論如何，呢種暴力行為又難道唔係一種罪惡咩？
然後喺呢場戲入面，Benedetta又一次展現佢嘅「神蹟」。
洗腳嘅同時，Benedetta留意到大使隻腳上面有隻跳蚤（黑死病嘅主要傳播途徑）從而推測到佢已經中咗招，當然你可以話所有嘢都咁啱得咁橋，你亦可以話正正係因為佢有平等愛每一個人，會幫大使洗腳呢個心態先會見到上帝畀佢嘅呢個啟示，所以重點都係，佢相信呢個係上帝要佢見到嘅嘢，乃至之後又用啟示嘅口吻去將上帝嘅呢啲話語講出嚟。
然後，點都要講吓入面關於兩位女性嘅愛同性。
首先要問嘅問題係，究竟兩女之間係咪有愛情喺入面呢？
我認為係有，但Benedetta並冇將呢種愛放喺佢對上帝嘅敬拜之上，佢由始至終都相信自已係上帝嘅妻子。
呢樣嘢喺最後一幕好明顯噉講咗出嚟，佢始終都係離開咗Bartolomea返返去Pescia（間修道院嘅所在地）即使知道自己返去等緊佢嘅係剝奪職務同被監禁。
而且Bartolomea亦都從Benedetta身上感受唔到佢嘅愛，佢叫Benedetta唔好再呃神騙鬼，完全唔相信佢所做嘅嘢係真。
畢竟Bartolomea由一開始就唔係因為相信上帝嘅存在而做修女，佢只係想搵一個避難所逃離父親嘅魔爪，即使Benedetta老豆肯為佢支付巨款畀修道院同佢Bartolomea老豆，佢都唔會當呢個係神蹟。
噉正好就可以帶落去講吓呢兩個修女嘅性愛究竟有冇問題。
唔知你哋留唔留意到，基本上戲入面有比較多少少描寫嘅人物，本身都有相關嘅罪去跟隨。
前院長好明顯係貪婪，大使就係傲慢，而前院長個女就係嫉妒（仲做假證）。
我諗Paul Verhoeven有心講嘅係：你們當中誰沒有罪，誰就先拿石頭砸她（犯姦淫嘅女人） — 約翰福音8:7
冇錯，其實佢哋並冇任何資格去批評Benedetta，但佢哋完全唔覺得自己係有罪，仲想用實質嘅權力去懲罰佢（留意Benedetta每次話人褻瀆嘅時候都係交畀上帝去懲罰），事實上佢哋最後全部都冇好下場。
但我想講嘅人，點解甚至乎去到現實，大部分嘅人都係着眼於究竟Benedetta噉做（或者導演噉拍）係咪褻瀆呢？
老實講如果係用現代嘅價值觀去睇，兩女所做嘅嘢根本就係現代人嘅日常生活，亦冇危害緊其他人，反而係另外三個人物嘅行為就算放喺現世都係一種害緊其他人嘅罪，究竟呢個係咪先係最值得人反思嘅位？
其實Paul Verhoeven會拍呢套戲真係好大膽，喺而家呢個郁啲就得罪人嘅社會仲敢（偷偷哋）拍呢啲咁具爭議性嘅議題。當然佢嘅回應亦係最好嘅答案：
“I do not understand really how you can be blasphemous about something that happened… You cannot basically change history after the fact. You can talk about that was wrong or not, but you cannot change history. I think the word blasphemy for me in this case is stupid”
