就係噉，我因為導演個名連trailer都冇睇就買咗飛入場。
但係戲名同poster我諗點都會接觸到嘅，所以我哋不如望一望張poster先（或者你可以直接跳兩段去睇講套戲嘅段落）：
成張poster剩係用咗三種顏色：黑、紅、灰。
用黑色做背景營造出神秘感，令到睇嘅人會估究竟係邊個攞把兇器插Emily（女主角）呢？而事實上搵出隱藏嘅兇手都係套戲嘅其中一個主題。
紅色有幾個作用：
- 帶出危險嘅感覺
- 表示出重點，所以冇咁重要嘅嘢就用灰色嚟寫，同時亦都做到一個緩衝嘅作用。
- 代表緊戲入面紅色嘅血係一個好重要嘅線索
- 需要留意嘅係Emily嘅眼都係紅色，亦都表明咗呢個「見」係戲入面其中一個好重要嘅元素。
（代表緊Gabriel（敵角）嘅戲名同Emily用同一隻色可能都暗示咗佢哋係同一個人）
唔計啲附加嘅字，成張poster由三個要素組成：戲名、戲名延伸出嚟嘅武器、Emily。
每次James Wan出一套新系列，就會令我學多咗一個新英文字。好好學嘅我見到套戲名即刻上cambridge dictionary查吓乜嘢意思。
噉cambridge dictionary就彈咗兩個解釋畀我，一個關疾病事，一個關邪惡事。聰明嘅我就直接無視咗第一個解釋，以為套嘢解惡意：having a strong wish to do harm，噉睇嚟，惡煞（意思係兇狠惡毒嘅人，多數會跟兇神後面，形容啲人個樣好有攻擊性）呢個譯名應該都譯得中規中矩。
錯！睇完套戲嘅我再睇返cambridge dictionary真係覺得自己好天真好傻，到頭嚟原來關疾病事嘅解釋 — 惡性先係正確，因為套戲講嘅就係一個畸胎瘤嘅故事：A malignant disease or growth is likely to get worse and lead to death。總之，我想講嘅係個譯名真係麻麻哋，可能諗住惡性同惡煞差唔多音。或者跟台灣嘅譯法「疾厄」譯做惡疾仲好。不過噉譯都有好處嘅，就係冇透露到套戲講咩，增加揭秘時嘅驚喜。
戲名延伸出嚟嘅武器除咗視覺上引導人望去下面嘅Emily之外，同時畀咗一種錯覺觀眾，覺得佢喺戲入面生命會受到危險。題外話香港啲戲院唔知係咪因為覺得張poster太恐怖遮咗Emily個樣，感覺有啲浪費，畢竟佢個頭先係張嘢嘅主角。
講埋Emily個頭，小弟覺得呢個頭真係一絕，當我哋第一眼望到呢個躺橫咗嘅頭加上黑色背景就好自然會覺得佢係瞓喺床上面，躺橫同瞓覺都增加咗Emily嘅弱勢，同時佢又唔係畀人封住把口嘅受囚禁狀態，暗示呢次襲擊係突如其來。剩係show個頭畀你睇代表要你focus落佢嘅面部表情，但同時可能都表達咗身體係一個關鍵，當然佢剩係得半邊面嘅原因都好明顯，就係象徵緊觀眾見唔到佢嘅嗰「另一半面」亦都係一個關鍵。（題外話如果張張poster放喺黑色背景度就會好似佢畀人斬咗個頭出嚟，令到個恐怖氣氛更濃厚～）
講咗咁耐終於講到套戲。
非常唔意外地，James Wan營造恐怖氣氛真係唔會令人失望。
第二場戲彈返起嘅梳化，轉緊嘅攪拌機刀片我諗我呢世都會記得，Sydney（主角個妹）去醫院搵線索成場戲睇到我幾鬼緊張，最尾返到屋企睇片真係舒咗一口氣，但同時呢啲都係James Wan一直好鍾意玩嘅誤導：用唔同嘅心理暗示話你知就嚟會有事發生，就好似第三個死者Dr. Victor Fields行入間房，開燈，整嘢，熄燈，想行出房，每一分每一秒我都覺得係喇係喇一定會有嘢喺呢個時候彈出嚟喇！然後咩事都冇，單純係一個老人家嘅日常片段。
當然呢樣嘢唔會令我覺得無謂，喺片段入面感受到嘅不安其實就已經係好好嘅體驗，James Wan一直都證明緊呢種感覺比jump scare更值得去探索，更有藝術價值。
當然如果呢套戲係止步於此嘅話，就好難喺James Wan嘅作品入面獨立出嚟，所以
非常意外地，呢套戲喺玩誤導嘅藝術方面係玩到出神入化嘅地步。
剩係講主角面對緊嘅敵人，一開始個個都以為係一種靈體，之後話你知Gabriel係一種真正存在嘅生物同時，又令你覺得主角好似Medium（鬼線人）噉有超能力可以睇到Gabriel行兇，睇返錄影帶時又會覺得Gabriel係主角幻想出嚟嘅朋友，最後先話你知原來佢哋一直用緊同一個身體，而呢個解釋又的確可以串連到之前嘅線索。
當你以為佢係一套鬼片，其實係一套驚悚片，再加啲懸疑同偵探元素。當迷底一解開，套戲突然就變咗cult cult哋嘅動作片。Gabriel喺兩場戲入面屠咗一個女子監倉同一間警局，呢個時侯就會有種感覺係，原來佢去咗拍Aquaman係要磨鍊吓拍動作戲嘅技術，當然呢種動作戲其實係冇離題，只不過係將平時連環殺人嘅恐怖片入面殺人嘅片段華麗化，而且血腥感十足，都係某類型恐怖片嘅題材。
再講多一個我覺得套戲最特別嘅位，就係上同下嘅關係。
大家都知道喺電影嘅世界，上層嘅人多數都會有較大嘅權力同能力。所以每次Emily喺間屋下層疑似有鬼嘅時候都會立即跑返上層攞返個制高點，而有一場相識睇過套戲嘅人都會有好深刻嘅印象，就係用overhead shot（由頭頂影落去）去影住Emily跑返上二樓嘅一場戲，呢種拍攝手法會令到角色處於完全弱勢同無助嘅狀態，事實上亦都令佢上樓呢個制空動作變得唔明顯。
但最令人驚訝嘅係，當女主角老母走甩之後因為地板太鬆跌咗落一樓（當時未知主敵角用緊同一個身體），呢個視角立即就變咗Gabriel每一望主角間屋嘅視角，主角呢個上樓嘅動作突然變得完全冇意義，因為佢要逃避嘅嘢比佢喺佢嘅更上方。而事實上主角成套戲嘅一舉一動Gabriel都完全知道哂，就好似用緊overhead shot望住佢噉，隨時掌握住主角嘅一切。
而呢個twist又係James Wan嘅一個誤導，通常呢啲恐怖生物（例如I.T.）都係棲息喺下水道，像徵住佢哋污衊，下等。而Gabriel捉走主角老母嘅地方係喺西雅圖地下城嘅通道，畀男警追捕嘅時候亦都立即捐入下水道，就算最尾係向上逃走，都已經令人確信佢個竇係喺下水道，精彩。
其實喺呢套戲上面睇得出James Wan喺恐怖片上面想搵一啲突破性，呢個可能都係佢次次開完個新系列就畀其他人拍嘅原因，因為佢想要喺恐怖片呢個類型上搵唔同嘅突破，而續集的確係會有一定嘅約束性。事實上Malignant喺呢一方面的確係幾成功，至少兩場打鬥就睇到我好爽，當然噉樣就會分薄咗戲入面驚嚇所佔嘅比例，但如果一成不變嘅話噉佢嘅作品就會流於公式化，而呢樣嘢都唔會係我哋觀眾想見到嘅事。
