呢個社會有噉樣嘅一群人
佢哋從來都清楚自己嘅性取向
但更清楚嘅，係上一個年代游走於空氣中嘅主流價值觀
即使人們唔會好似witch hunt噉要置佢哋於死地
周圍嘅人嘅閒言閒語，朝佢哋展現出嘅厭惡反應
都對該群體嘅人產生不能修補，心靈上嘅創傷
以至佢哋要連人類最本能嘅欲望
都要收喺月餅盒入面，試圖向世界隱瞞
然後，當佢哋接受咗命運，履行完社會賜與佢哋嘅責任，喺人前飾演好人哋所期望嘅人之後
當佢哋嘅年紀去到可以從工作中退休嘅時候
佢哋仲係冇辦法從無形嘅壓力中退休
呢套作品，就係講述兩個生活喺呢種背景之中嘅人，之間嘅愛情故事
故事從太保飾演嘅柏每日第一樣例行公事，清潔的士嘅擋風玻璃開始
柏有一個喺普世價值觀底下，算係比較幸福美滿嘅家庭
有個關心佢對佢嘅脾氣同冒失一清二楚嘅老婆
有個已經成家立室嘅仔同將要結婚嘅女
柏喺戲入面，從來都冇除底佢套喺左手無明指上嘅結婚戒指
所以，柏從來冇打算去追求另一段穩定嘅關係
當兩人第一次見面嘅時候，柏因為海唔想立即同佢發生性關係而轉身走人
導演喺映後分享指佢曾經有一個受訪者將自己嘅同性戀傾向形容為賭博，賭癮一起，去搵人滿足一吓呢個欲望，就完事了
我諗呢個就係柏呢個角色嘅其中一個原形
而由袁富華飾演嘅另一個主角海嘅背景相對就比較具壓迫感
海嘅老婆好早就同佢離咗婚，所以佢一直父兼母職獨力帶大自己個仔
喺遇到柏之前，佢最親嘅就只有個仔同個孫
可惜由小野飾演嘅永似乎因成長於單親家庭嘅關係，自專心比較強而且具有一定嘅控制欲，每個家庭成員嘅舉手投足似乎都要符合佢心目中嘅「正確」，加上全家人嘅基督教背景
令海嘅每一步都要小心翼翼，唔可以暴露佢嘅同性傾向
但海同柏唔一樣，海渴望一段長久嘅關係
當兩人第一次見面嘅時候，當柏問海要唔要發生性關係嘅時候，海提議兩人不如做住朋友先
但海同柏唔一樣，海冇一個可以放棄同性關係之後仲返到去嘅歸屬
佢需要去考慮當佢老到冇能力自己照顧自己嘅時候，自己嘅去向
但即刻係將來有機會入住一間男同性老人院，海都會選擇去「正常」嘅老人院，就算到咗不能自理之年，佢都唔敢同至親嘅人打開心扉
導演提到有某一啲受訪者好堅決噉認為自己嘅親屬唔知自己嘅性取向，但其實眼明人一睇就意識到呢個一早就唔係咩秘密，有時佢哋只係想自欺欺人而已
故事嘅中期係兩人甜蜜嘅過雖然有唔少情慾鏡頭，但導演所用嘅手法例如局部close up或者用通過凹凸鏡片（唔知專業名詞）去拍攝都令畫面昇華到去極其優雅嘅層面
同時亦用上一啲特別嘅鏡頭例如隨風飄動嘅廁紙漸息或者已經空空如也嘅透明消毒液樽去暗示兩人纏綿嘅終結
實在漂亮
當然畀觀眾一個機會透過鏡頭一睹男同性戀者嘅秘密俱樂部都係令人大開眼界嘅一點
當筆者從導演口中得知佢哋做資料蒐集時親身上過去某間俱樂部兩次時，實感配服
去到故事接近尾聲嘅時候，兩人都迎接咗喺呢個故事入面最大嘅改變
柏嘅女芳終於同男朋友鄭結婚
而由於鄭結婚嘅時候仲未搵到工，柏就提議借架的士畀佢去搵食
繼而叫埋鄭同班同業踢毽嘅畫面亦都呼應咗一開頭嘅情景
象徵住佢將呢個業務交到下一輩手上
亦都意味住柏要離開佢嘅的士生活
的士對柏嚟講，就好似佢另一個屋企噉
當柏允許海坐上副座嘅時候，當佢戴住海去桑拿嘅時候，當佢夜晚返屋企望出車外嘅點點綠燈時，的士無意中代表咗佢同性取向嘅一面
所以佢當佢唔再揸的士嘅時候，佢決定將海送畀佢嘅十字架還返畀佢
佢知道係時候要脫身，唔係結果只會泥足深陷，藕斷絲連
而呢個就係海嘅重大改變
導演話，當海去參加芳嘅婚禮，臨走回頭一望嘅時候
佢就知呢個男人唔會為咗佢離開呢個家庭，唔會同佢長相廝守
所以喺愛別離苦嘅絕望中只能夠寄信宗教
只能夠將十字架吊墜送畀柏
因為佢想喺死後，仲可以搵得返佢嘅愛人
但最後，將無所謂啦當成口頭禪嘅柏竟然有所謂噉還返個吊墜畀佢
然後背向大海離開
算係表明咗心意
離開嘅心意
當然喺電影嘅最後
我哋仲可以見到柏行入一間教堂坐底
我哋仲可以知道佢其實仲留戀住海
仲想喺死後同佢相遇
Love it so bad
100/10
Ps: 導演話室內用嘅都係黃燈係想營造出家溫暖嘅感覺，而柏屋企嘅燈一直都係咁柔和，而海屋企嘅黃燈去到故事後期會比較稠密去表達身處喺當中嘅壓力越嚟越大
Ps2: 我本身以為導演有心令柏喺兩人纏綿嘅時候刻意用戴住結婚戒指嘅左手去強調家庭仍然喺佢心底留有一席位，亦以為海嘅宗教背景係想產生時至今日大部分嘅教會仍然視同性取向係罪嘅衝突，但好似係我諗多咗
Ps3: 太保喺金像獎攞到最佳男主角實至名歸，戲入面有唔少背景說明式對白，當中的確可以睇到太保比起袁富華技高一籌
Ps4: 絕對係筆者近年最鍾意嘅港產片
